اس کی تصویر کو سینہِ سے لگائے رکھنا

اس کی تصویر کو سینہِ سے لگائے رکھنا ہِجَر میں وصل کا ماحول بنائے رکھنا

اپنی آنکھوں میں کہیں چند خوشی کے آنسو اے مرے دوست مرے نام بچائے رکھنا

عمر لمبی ہے بہت ظلمتِ شب کی لیکن شمعِ اُمّیدِ سحر پھر بھی جلائے رکھنا

زندہ رکھنا ہے اگر خواہشِ تعبیر کوئی آتشِ خواب تو لازم ہے جگائے رکھنا

مان ہی لے گا زمانہ تمہیں اہلِ دانش اپنے سر پر یونہی دستار سجائے رکھنا

چشمِ گریہ سے بس اتنی سی گزارش ہے مری رُو بہ رُو ان کے غمِ زیست چھپائے رکھنا

شہرِ دل ساری تمنّاؤں سے خالی کرکے کیا ضروری ہے کوئی درد بسائے رکھنا

ہِجَر کی دھوپ کا احساس نہ جائے جب تک سائباں زلف کا تم اپنی بنائے رکھنا

تم اگر مجھ سے عداوت پہ مُصِر ہو تو چلو مجھ کو آتا ہے یہ رشتہ بھی نبھائے رکھنا

ہے مُحبّت تو کبھی یار مرا دل بھی رکھو یہ بھی کیا بات ہوئی صرف ستائے رکھنا

گھر کا رستہ اسے معلوم ہے اشعؔر لیکن اک دیا بام پہ تم پھر بھی جلائے رکھنا

دشمنی کیسےہو ثابت کوئی میخانہِ سے

دشمنی کیسےہو ثابت کوئی میخانہِ سے کوئی رشتہ مرا ساقی سے نہ پیمانہِ سے

جب سے تو نے مجھے دیوانہ کیا ہے جاناں لوگ رکھتے ہیں محبّت ترے دیوانہِ سے

غم کوئی ان سے بچھڑنے کا نہ ملنے کی خوشی ہم سفر ہوکے بھی رہتے ہیں جو بیگانے سے

میری بات اور ہے ناصح یہ بتادے مجھ کو باز آیا کوئی مجنوں ترے سمجھانے سے

اپنے خوابوں سے یہی خوف سا رہتا تھا مجھے لے نہ جائے کوئی تعبیر کو سرہانے سے

مجھ سے خود پوچھتی رہتی ہے یہ اشکوں کی نمی کیا قباحت ہے بچھڑنا کسی انجانے سے

جیسےآجاتی ہے ویرانۂ گلشن میں بہار بزم میں آگئی رونق ترے آجانے سے

تجھ کو نزدیک سے دیکھا تو یہ محسوس ہوا مل چکا ہوں کہیں پہلے ترے افسانہِ سے

قربتِ شمع کی دعوت پہ چلے ہیں اشعؔر خاک ہوجانے کی امّید ہے پروانہِ سے

سماں جمود کا جانے یہ کب بدل جائے

سماں جمود کا جانے یہ کب بدل جائے رخِ ہوا ذرا بدلے تو سب بدل جائے

یہ رنگِ ظلمتِ حاضر کی عمر ہی کیا ہے دیوں کی لَو ہی بڑھادو تو سب بدل جائے

ہمارے درد کو آہنگ اپنا دو تو سہی گھڑِ ی نہ بیتَے فضائے طرب بدل جائے

تو کیسے اٹھے ہوئے ہاتھ شرمسار نہ ہوں دعا ہی تیری اگر زیرِ لب بدل جائے

بتاؤ کیسے نہ پھر دوستی کو ہاتھ بڑھیں اگر عناد کا واحد سبب بدل جائے

بدلتے دیکھے ہیں کہسار و وادی و صحرا عجیب کیا ہے جو طرزِ ادب بدل جائے

خوشی سے کہنا تم اشعؔر کو بے وفا لیکن و ہ شخص وقت کے ہمراہ جب بدل جائے

یاں تو جاں پر بنی سی لگتی ہے

یاں تو جاں پر بنی سی لگتی ہے اور انہیں دل لگی سی لگتی ہے

پھیل جائے گی خوشبوؤں کی طرح یہ مجھے عاشقی سی لگتی ہے

بھولتا ہوں تجھے تو کچھ دل میں دھڑکنوں کی کمی سی لگتی ہے

تیری آہٹ ہو جب ذرا محسوس زندگی ناچتی سی لگتی ہے

تیرے آنے سے ساری محفل میں ایک دیوانگی سی لگتی ہے

ڈوب کر اس کو دیکھتے رہنا اک طرح بندگی سی لگتی ہے

وہ جو دہلیز پر قدم رکھ دے صحن میں چاندنی سی لگتی ہے

تجھ سے ملنے کی جب اُمّید بندھے زندگی، زندگی سی لگتی ہے

اس کی بے ساختہ اداؤں میں کس قدر سادگی سی لگتی ہے

کیوں ہے اعلانِ صبح کی تکرار شہر میں تیرگی سی لگتی ہے

دیکھ لیتا ہوں جب اُسے اشعؔر خواب میں روشنی سی لگتی ہے