آئینے پریشاں ہیں یہ کیا دیکھ رہا ہوں

آئینے پریشاں ہیں یہ کیا دیکھ رہا ہوں اک معجزۂ حَرفِ دعا دیکھ رہا ہوں

گو میری طلب حد سے کہیں بڑھ کے تھی لیکن میں ابرِکرم اس سے سوا دیکھ رہا ہوں

اک فکرِ مصائب ہے زِیاں جان کا یارو میں سایہ فگن لطفِ خُدا دیکھ رہا ہوں

مایوس نہیں تیرگیِ شب سے میں جب تک اک بام پہ بھی کوئی دیا دیکھ رہا ہوں

اخلاص و محبّت ہو کہ ہو بُغض و عداوت میں آپ کی ہر ایک ادا دیکھ رہا ہوں

کب تک وہ مرے نام سے رہتا ہے گُریزاں کب تک نہیں آتی ہے صدا دیکھ رہا ہوں

ناداں مری خاموشی کو تائید نہ سمجھو رہزن ہو کہ تم راہ نما دیکھ رہا ہوں

لگتا ہے وہ تجھ کو بھی کہیں مل نہیں پایا رفتار تری بادِ صبا دیکھ رہا ہوں

واقف ہوں ہر اک مرحلہء عشق سے اشعؔر دیوار پہ جو کچھ ہے لکھا دیکھ رہا ہوں

خشک ہے حلق مرا، خالی ہے ساغر کہہ دوں

خشک ہے حلق مرا، خالی ہے ساغر کہہ دوں کیوں نہ اے ساقی مرے تجھ کو ستم گر کہہ دوں

بھوک نے کھا لیا ہر خوفِ رسن و دار ترا تو جو چاہے تو میں جابر تجھے منہ پر کہہ دوں

میں تمہارا ہوں، یہ پیغام تو پہنچا ہوگا پھر بھی وشواس نہیں ہے تو میں آکر کہہ دوں

مجھ سے کیا پوچھے ہے ان آنکھوں کی گہرائی ابھی دو گھڑی ڈوب کے کیا رازِ سمندر کہہ دوں

میری ہر آرزو اس کی بھی تمنّا ہے مگر اس کے ہونٹوں پہ نہ آئے تو میں کیوںکر کہہدوں

ہو تو جائے گا وہ ناراض مگر کیا کیجیے ضبطِ دل سے ہی سہی، کچھ تو میں اشعؔر کہہ دوں

کچھ ایسا اُٹھا ہے مجھ سے مری نظر کا یقیں

کچھ ایسا اُٹھا ہے مجھ سے مری نظر کا یقیں کہ آہی جائے گا مجھ کو ترے ہنر کا یقیں

اب اس سے بڑھ کے بھلا اعترافِ شب کیا ہو دلارہے ہیں وہ کب سے ہمیں سحر کا یقیں

کسی کا ہو نہ تعاقب نہ یاوروں کی تلاش ملے جو ہم کو کہیں اپنے ماحضر کا یقیں

فریبِ لذّتِ عصیاں میں ہم نہ آتےمگر ہمیں نصیب تو ہوتا کسی ضرر کا یقیں

لگے نہ لمحہ پلٹنے میں گھر کی اُور مگر

کوئی دلائے تو ہم کو ہمارے گھر کا یقیں

شکستہ کیسے ہو امّید سائے کی جب تک ہماری آبلہ پائی کو ہے شجر کا یقیں

ہر اک صدف کا مقدّر جدا جدا ہے مگر ہر اک صدف سے ہے قائم کسی گہر کا یقیں

مجھے یقیں ہے کہ میں اس کا ہو نہیں سکتا اسے دعاؤں میں اپنی مگر اثر کا یقیں

گلے لگاتی ہیں جب خوشبوئیں جبیں کو مری تو ہونے لگتاہے پھر ان کے سنگِ در کا یقیں

اِدھر کا سلسلہ ہوجائے بے مثال اشعؔر نمو جو پائے ترے دل میں کچھ اُدھر کا یقیں