دل تو بے اختیار تھا کیا کیا

دل تو بے اختیار تھا کیا کیا پر ذرا سا غبار تھا کیا کیا

شعلۂ جاں کبھی، کبھی شبنم کارِ ابروئے یار تھا کیا کیا

کر گیا راکھ دل، نظر پتّھر حسن کا اک شرار تھا کیا کیا

سایۂ زلف، چشم و عارض و لب حاصلِ انتظار تھا کیا کیا

لذّت جان و دل قرارِ جنوں اس کی بانہوں کا ہار تھا کیا کیا

جن دنوں واقفِ فراق نہ تھا دل یہ باغ و بہار تھا کیا کیا

اس کی ہر بات پر مرا ایماں اس پہ اک اعتبار تھا کیا کیا

اشعؔر دل فگار و دیوانہ حسرتوں کا مزار تھا کیا کیا