کیا خوب بے حساب تھا، اچھا لگا مجھے

کیا خوب بے حساب تھا، اچھا لگا مجھے دریا سا اک سراب تھا اچھا لگا مجھے

تیرے سوا خدا نے مجھے جو بھی کچھ دیا سب مفت کا ثواب تھا اچھا لگا مجھے

فُرقت کا سلسلہ تری یادوں کے دوش پر حالانکہ اک عذاب تھا اچھا لگا مجھے

وہ شخص مجھ میں ایک چراغاں سا کرگیا مانندِ آفتاب تھا، اچھا لگا مجھے

دل کی خلش سمجھ کے جِسے ٹالتا رہا وہ ایک زخمِ ناب تھا، اچھا لگا مجھے

جس طرح دے رہا تھاوہ بدلہ وفاؤں کا بالکل نیا حساب تھا، اچھا لگا مجھے

میرا وجود آپ کے پہلو میں جس طرح اک پیالۂ شراب تھا، اچھا لگا مجھے

ہر فرد جس نے دیدیا گھر کا رِ زکواۃ میں کیا صاحبِ نصاب تھا، اچھا لگا مجھے

اشعؔر جو ہے شریکِ سفر آج بھی مرا وہ ہی تو میرا خواب تھا، اچھا لگا مجھے