دل تو بے اختیار تھا کیا کیا

دل تو بے اختیار تھا کیا کیا پر ذرا سا غبار تھا کیا کیا

شعلۂ جاں کبھی، کبھی شبنم کارِ ابروئے یار تھا کیا کیا

کر گیا راکھ دل، نظر پتّھر حسن کا اک شرار تھا کیا کیا

سایۂ زلف، چشم و عارض و لب حاصلِ انتظار تھا کیا کیا

لذّت جان و دل قرارِ جنوں اس کی بانہوں کا ہار تھا کیا کیا

جن دنوں واقفِ فراق نہ تھا دل یہ باغ و بہار تھا کیا کیا

اس کی ہر بات پر مرا ایماں اس پہ اک اعتبار تھا کیا کیا

اشعؔر دل فگار و دیوانہ حسرتوں کا مزار تھا کیا کیا

دُعا کوئی بھِی میری پُر اثر ہوتی کہاں ہے

دُعا کوئی بھِی میری پُر اثر ہوتی کہاں ہے مرے صیّاد کی مجھ پر نظر ہوتی کہاں ہے

کسی انداز سے کوئی بھی تمثیلِ تکبُّر ثمر کے بوجھ سے شاخِ شجر ہوتی کہاں ہے

جدھر چاہو اُڑو رہتے ہوئے حدِّ قفس میں بہت مشکل سزائے بال و پر ہوتی کہاں ہے

بہت سے قیس ہوجاتے ہیں صحراؤں کی مٹّی میں مُروِّج یوں ہی تمثال دگر ہوتی کہاں ہے

دلوں میں کون سی خواہش ہے جو پائی نہ جائے تمنّا کوئی بھی پوری مگر ہوتی کہاں ہے

نہ سمجھے آبلہ پائی کی جو عظمت اسے پھر مُیسّر کوئی اقلیمِ ہُنر ہوتی کہاں ہے

خدارا ہم کو بتلادو وہیں رہ لیں نہ جاکر محبّت دوستوں کی بے ضرر ہوتی کہاں ہے

کسی کو سطحی لگتا ہے سُخن، گہرا کسی کو سبھی کی آنکھ میں یکساں بصر ہوتی کہاں ہے

نہ دے جو لُطفِ پیہم ایک تیرِ نیم کش کا نگاہِ یار ایسی بے ہُنر ہوتی کہاں ہے

سمجھتا ہے جو اپنی بات کو بس حَرفِ آخر کسی کے ساتھ بھی اس کی بسر ہوتی کہاں ہے

ہمیں بتلاؤ کس شب سے رکھیں امّید اشعؔر ہمارے گھر میں ہر شب کی سحر ہوتی کہاں ہے