عشق سُود و زیاں نہ رہ جائے

عشق سُود و زیاں نہ رہ جائے دہر مثلِ دُکاں نہ رہ جائے

ہم کو دل سے نکال دو لیکن دشت صورت مکاں نہ رہ جائے

آؤ یوں سامنے کہ پھر کچھ بھی آئینوں سے نِہاں نہ رہ جائے

نقشِ پا چھوڑ کے نہ کھو جانا منتظر کہکشاں نہ رہ جائے

ٹوٹ کر ضربِ ضبطِ گریہ سے سازِ آہ و فغاں نہ رہ جائے

ترکِ الفت کرو تو یوں کرنا کوئی شے درمیاں نہ رہ جائے

میں بھی کرلوں گا اعتبارِ وفا گر تجھے خود گماں نہ رہ جائے

خوابِ منزل نہ دیکھ رستوں پر ہوکے گم کارواں نہ رہ جائے

چارہ گر اور مہرباں اشعؔر محوِ حیرت جہاں نہ رہ جائے