اگر یہ سچ ہے کہ شوقِ وصال رہتا ہے

اگر یہ سچ ہے کہ شوقِ وصال رہتا ہے تو گویا اس کو ہمارا خیال رہتا ہے

اب اس کے جیسا کہاں ہے کوئی جو ساتھ رہے ہمارے دل میں تو اک بے مثال رہتا ہے

کہاں ہے ہم کو تہی دامنی کا کوئی گلہ کہ جیبِ دل میں بہت سا ملال رہتا ہے

وہ ہے رحیم بھی رحمٰن بھی وہی لیکن اسی کے قبضہِ میں قہروجلال رہتاہے

کوئی مذاق نہ ہوہم سے تیرا عہدِ وفا کہ حسن والوں میں یہ بھی کمال رہتا ہے

وہ شخص لائقِ تقلید کیوں نہ ہو آخر شکم میں جس کے بھی رزقِ حلال رہتا ہے

کسی میں تاب ہو اتنی تو جھانک کر دیکھے ہماری آنکھوں میں کس کا جمال رہتا ہے

قدم بہکنے میں کیا دیر ہو مگر اکثر خدا کا شکر نظر میں مآل رہتا ہے

وہ جان لیتا ہے اشعؔر مع سیاق و سباق ہماری آنکھوں میں جو بھی سوال رہتا ہے