بھلانے کے لیے تجھ کو سہارا چاہتا ہوں

بھلانے کے لیے تجھ کو سہارا چاہتا ہوں میں اس بارے میں بھی تیرا    اشارہ چاہتا ہوں

میں جل کر واقفِ تسکینِ آتش ہوگیا ہوں تجھے اے برق ورنہ کیوں دوبارہ چاہتا ہوں

محبت کے افق پر اک تری نسبت سے اپنا بلا کا منفرد کوئی ستارہ چاہتا ہوں

بھرم ہے دید کا رکھنا تو تابِ حسن بھی دے کہ میں جلوؤں کی بینائی کا یارا چاہتا ہوں

لڑائی پر میں ان موجوں سے شرمندہ نہیں ہوں یہ جنگِ زندگی ہے میں کنارہ چاہتا ہوں

خدا سے خواہشِ دنیا بہت بڑھ کر نہیں ہے بس اک معقول با عزّت گزارہ چاہتا ہوں

مسلسل کیسے دیکھوں آئینے کا تکتے رہنا ترے دیدار پر اپنا اجارہ چاہتا ہوں

بہت سے لوگ محفل میں تجھے دیکھیں گے لیکن میں خلوت میں ترا پہلا نظّارہ چاہتا ہوں

رہا ہوں مدّتوں مانوس جس دریا سے اشعؔر اسی دریا کی موجوں سے کنارہ چاہتا ہوں