صرف اس بات پہ حیراں ہیں تمہاری آنکھیں

صرف اس بات پہ حیراں ہیں تمہاری آنکھیں زندگی کا مری ساماں ہیں تمہاری آنکھیں

جو رہینِ لبِ اظہار نہیں ہے اب تک اس تمنّا سے گریزاں ہیں تمہاری آنکھیں

کتنی مشکل ہے رسائی کوئی مجھ سے پوچھے دیکھنے میں بڑی آساں ہیں تمہاری آنکھیں

انگلیاں کیوں نہ اٹھیں گی رخِ حیراں کی طرف ساری محفل میں نمایاں ہیں تمہاری آنکھیں

اب تو یوں ہے کہ رہے راز یا افشا ہوجائے زندگی کا مری عنواں ہیں تمہاری آنکھیں

اس طرف اک ورقِ سادہ سا چہرہ ہے مرا اور ادھر مثلِ کتب خواں ہیں تمہاری آنکھیں

میں تو خود آکے یہاں قید ہوا تھا جاناں کیوں بھلا اتنی پشیماں ہیں تمہاری آنکھیں

تم کوئی بات بھی اشعؔر سے چھپاؤ کیسے ترجمانِ دلِ پنہاں ہیں تمہاری آنکھیں