یہی سچ ہے سو کہہ دینے کی ہمّت ہوگئی ہے

یہی سچ ہے سو کہہ دینے کی ہمّت ہوگئی ہے مجھے اے زندگی تجھ سے محبّت ہوگئی ہے

ترا کچھ ربط ہے ایسا مرے تارِ نفس سے تجھے سانسوں میں رکھنے کی ضرورت ہوگئی ہے

بس اک آہٹ کا رشتہ ہی نہیں مخبر ہے تیرا رگِ جاں سے تری خوشبو کی نسبت ہوگئی ہے

تعلّق کیا ہوا قائم تری چاہت سے میرا مجھے کچھ اور دن جینے کی حسرت ہوگئی ہے

محبّت درد ہے فرقت ہے رسوائی ہے لیکن انہی اجزائے ترکیبی سے الفت ہوگئی ہے

ترے دستِ حنائی سے ملے جو رنگ ونکہت مرے پھولوں میں بھی تیری شباہت ہوگئی ہے

مرے شوقِ طلب پر وہ ترا قاتل تبسّم دلِ بسمل پہ جیسے اک قیامت ہوگئی ہے

تجھے کیا پالیا افلاک سے دستِ دعا نے میں سمجھا سُرخرو میری عبادت ہوگئی ہے

اب اس سے بڑھ کے کیا ہوگا ثبوت اپنائیت کا انہیں مجھ سے تغافل کی شکایت ہوگئی ہے

میں اس فردوس کے حیراں ملائک سے کہوں گا ندامت ہی مری شاید برأت ہوگئی ہے

نئی غزلیں نئے انداز اور افکارِ تازہ یہی رسوائی اشعؔر وجہِ شہرت ہوگئی ہے