غلط کہ دخل غزل میں مرے کمال کا ہے

غلط کہ دخل غزل میں مرے کمال کا ہے مرے سُخن میں یہ جلوہ ترے خیال کا ہے

کمالِ سحرِ تکلّم مرا بھی ہوگا مگر مرے جواب میں جو ہر، ترے سوال کا ہے

وہ رنگِ قوسِ قزح ہوں کہ نکہتیں ان کی جمال پھولوں میں سارا تری مثال کا ہے

کسی کو ہوش کہاں تھا کہ خود کو جان سکے یہ بے خودی کا تماشا اُسی دھمال کا ہے

جسے بھی دیکھو، رقیبانہ دیکھتا ہے ہمیں ہمارا آپ کا رشتہ بڑے کمال کا ہے

جو آگیا کئی آنکھوں سےمنعکس ہوکر یہ نور چہرے پہ میرے، تیرے جمال کا ہے

جلال اس کا بھلا کیا کوئی بیان کرے یہ حشرِ طوُر تو اک جلوۂ جمال کا ہے

تمہاری آنکھوں کے حلقے یونہی نہیں اشعؔر میں جانتا ہوں یہ بادل کسی ملال کا ہے