فغاں میں اپنی کوئی نغمہء طرب بھی نہیں

فغاں میں اپنی کوئی نغمہء طرب بھی نہیں لبوں پہ اور تبسّم کا کچھ سبب بھی نہیں

میں عام رستوں پہ چلتا نہیں ہوں خیر مگر جو راہ میری ہے اپنی بہت عجب بھی نہیں

میں گِڑ گِڑاؤں کہ پیاسا ہوں ہاتھ پھیلادوں انا کا قتل کروں ایسا جاں بہ لب بھی نہیں

سحر کے قدموں پہ نظریں لگی ہیں سب کی مگر وہ ایک شخص جسے اضطرابِ شب بھی نہیں

یہ ماہ و سال کی جاناں بساط ہی کیا ہے نصابِ عشق میں شامل حسب نسب بھی نہیں

روش ہے عام فریبِ خلوص کی اشعؔر نہیں تھا پہلے بھی قائل میں، اور اب بھی نہیں