جب گلستاں میں یار تو ہی نہیں

جب گلستاں میں یار تو ہی نہیں پھر کسی گل کی آرزو ہی نہیں

اپنے لب خود ہی کون     سیتا ہے کیا کریں اذنِ گفتگو ہی نہیں

چاکِ دل کیا دکھائیے اس کو اس میں بخیہ گری کی خُو ہی نہیں

خود کو زندہ کہوں تو کیسے کہوں زندگی میرے رُو بہ رُو ہی نہیں

بن بلائے میں جا کے اس سے ملوں کیا مری کوئی آبرو ہی نہیں

کارِ خود آگہی ہے یوں بھی کٹھن اور تماشا کہ ،جستجو ہی نہیں

دشت جیسا لگے تو کیوں نہ لگے دل میں جب شہرِ آرزو ہی نہیں

راحتِ جاںمرا غنیمِ سکوں اک زمانہ ہے صرف تُو ہی نہیں

جام خالی ہیں مئے کشوں کے سبھی دسترس میں کوئی سَبُو ہی نہیں

نعت کا حق ادا نہ ہو پایا حرف لگتے ہیں با وضو ہی نہیں

اس مسیحا سےکیا گلہ اشعؔر زخمِ دل میرا سُرخرو ہی نہیں