عجب خزانہء نایاب میری ذات میں ہے

عجب خزانہء نایاب میری ذات میں ہے کسی کے لمس کا احساس میرے ہاتھ میں ہے

یہ دیکھنا ہے کہ اب کون کھینچتا ہے ہمیں اک اور چاند کی آمد بھی چاند رات میں ہے

کھِلے ہیں پھُول چمن میں ہر ایک سمَت مگر مری بہار توبس تیرے التفات میں ہے

جلادو سارے گھروں کو مگر خیال رہے تمہارا گھر بھی اسی عصرِ حادثات میں ہے

تمہی کہو مجھے اب دوستوں کا ڈر کیوں ہو کہ میرا دشمنِ جاں اب تو میرے ساتھ میں ہے

جو ہوسکے تو کہیں اس کو قید کرلیجیے ابھی تو شکر ہے یہ وقت اپنے ہاتھ میں ہے

ہم اپنے شہر کا احوال کیا لکھیں اشعؔر نہ دن میں کوئی کشش ہے، نہ لطف رات میں ہے