دریچہ کوئی ہوا کا ہمارے گھر میں کہاں

دریچہ کوئی ہوا کا ہمارے گھر میں کہاں پر اس سے اچھا قفس بھی کوئی نظر میں کہاں

بھلی تو ہوگی صَنوبر کی چھاؤں بھی لیکن تمہاری زلف کی حدّت کسی شجر میں کہاں

تلاش کرتے ہو تم جس کو آسمانوں میں وجود اس کا نہیں ہے تو، بحر و بر میں کہاں

میں اس سے کیسے کہوں رات جلد لوٹ آنا وہ میرا بیٹا اب اتنا مرے اثر میں کہاں

میں دو گھڑی کبھی خود سے بھی مل لیا ہوتا سُکُون ملا ہی مجھے ایسا عمر بھر میں کہاں

ہے جزوِ ایماں محمدؐ بشر ہی تھے بے شک مثال ان کی مگر ہاں کسی بشر میں کہاں

ذرا وہ ہوش میں آئے تو میں کہوں اس سے مقامِ عجز کا اقبال کرّوفر میں کہاں

نہ گرتی برق تو ہم کو پتا ہی کیا چلتا جو بات سوزشِ لب کی ہے وہ شرر میں کہاں

میں کہہ تو دیتا جو لکھتا ہوں معتبر ہے مگر کوئی بھی زعمِ ہنر حَرفِ معتبر میں کہاں

مزہ تو جب تھا کہ رہزن کو ماردیتا کوئی مگر یہ زور کسی اپنے راہبر میں کہاں

مری دعا میں جو رہتی ہے صبحِ نو اشعؔر وہ شب گزیدہ سویروں کی رہ گزر میں کہاں