چھپانا چاہیے جو بات وہ بتاؤ نہیں

چھپانا چاہیے جو بات وہ بتاؤ نہیں جو سُرخرو نہ ہوا ، زخم وہ دکھاؤ نہیں

نشاں کوئی رہِ منزل کا جب تلک نہ ملے فریبِ عزمِ سفر کی طرف بلاؤ نہیں

حرام اس لیے رکھی ہے خودکشی کہ میاں کسی نے تم کو بُلایا نہیں تو جاؤ نہیں

فراقِ زیست کی تعبیر ہی ثمر ہے اگر تو خوابِ وصل کو بہتر ہے پھر اُگاؤ نہیں

اب ان سے جیتنا اچھا لگے تو کیسے لگے ابھی تو دل نے کہا ہے انہیں ہراؤ نہیں

یہ شہرِ دل کہیں ویران ہی نہ ہوجائے اک حد سے بڑھ کے تمنّاؤں سے بساؤ نہیں

ارادہ ترکِ ستم کا ہی کرلیا ہے اگر تو زندگی میں رہا کیا ہمیں بچاؤ نہیں

رہِ حیات میں جب دوقدم نہ ساتھ چلے تو رسمِ دنیا پئے مرگ بھی نبھاؤ نہیں

تو کیوں نہ اہلِ خِرَد خود کو سُرخرو جانیں اگر جنونِ محبّت میں رکھ رکھاؤ نہیں

نہیں ضرورتِ شرحِ وصال تم کو اگر تو پھر یہ کیا کہ بلاؤ نہیں اور آؤ نہیں

میں بے حسی پہ زمانہِ کی رو نہ دوں اشعؔر جو نغمہ درد سے عاری ہے وہ سناؤ نہیں