کہا یہ کس نے ملن کے اصول کچھ بھی نہیں

کہا یہ کس نے ملن کے اصول کچھ بھی نہیں ہمیں یہ شکلِ شرائط قبول کچھ بھی نہیں

تمام حسنِ چمن، میَں سمیٹ لایا مگر تمہارے سامنے کیا ہیں، یہ پھول کچھ بھی نہیں

ہے چونکہ تم سے ہی منسوب ہر شکست مری اسی لیے تو مرا دل ملول کچھ بھی نہیں

ہماری آبلہ پائی کو دیکھ لیتے اگر تمہی یہ کہتے کہ چہرے کی دھول کچھ بھی نہیں

کبھی کبھی میں اُسے بے خودی میں بھُول گیا مگر میں کیسےکہوں، میری بھول کچھ بھی نہیں

ہے ذرّہِ ذرّہِ کا کردار طے شدہ اشعؔر تمام ارض و سماء میں فضول کچھ بھی نہیں