ہمارا زخمِ دل اب تو بہت کم ہوگیا ہے

ہمارا زخمِ دل اب تو بہت کم ہوگیا ہے تمہارا پوچھنا "کیسےہو" مرہم ہوگیا ہے

کسی لمحہ بھی گرسکتی ہے بجلی آشیاں پر سنا ہے اک ستم گر ہم سےبرہم ہوگیا ہے

کہاںملتے ہیں سب کے ہاتھ میں اب اتنے پتّھر مرا بھی آنا جانا اب وہاں کم ہوگیا ہے

تجھے محسوس ہوتا ہے تغیّر تو عجب کیا کسی کا غم مری خوشیوں میں مدغم ہوگیا ہے

بہت امکان ہے ہونے لگے اب خوں کی بارش کہ سیلِ اشک آنکھوں میں بہت کم ہوگیا ہے

کئی اُمّیدیں وابستہ تھیں اس گلشن کی جن سے چراغِ انقلاب ان کا بھی مَدّھم ہوگیا ہے

جسے پیتا رہا ہوں میں کوئی امرت سمجھ کر وہی مشروبِ جاں تقدیر سے سَم ہوگیا ہے

نہ وہ رستہِ میں تھا میرے، نہ میں اس کے گماں میں مگر اب واقعہ یہ ہے کہ سنگم ہوگیاہے

بہت تفصیل سے قصّے وہاں کے کیا سناؤں مرا ان محفلوں میں جانا کم کم ہوگیا ہے

جدھر دیکھو اُدھر "جاؤ مشرّف جاؤ"، اشعؔر یہ نعرہ سنتے سنتے ناک میں دم ہوگیا ہے