بہت ڈرتا ہوں فطرت پر غزل کیسے کہوں میں

بہت ڈرتا ہوں فطرت پر غزل کیسے کہوں میں تباہی اور ہلاکت پر غزل کیسے کہوں میں

جو آنکھوں تک پہنچنے ہی نہیں دے خوں کے آنسو دلوں کی اس شقاوت پر غزل کیسے کہوں میں

دکھاتے ہو مجھے ہر سَمت جب زہریلے منظر تمہیں سوچو حلاوت پر غزل کیسے کہوں میں

عنایت ہےکہ جو بے سَر تھا، ہے دستار والا مگر ایسی عنایت پر غزل کیسے کہوں میں

کہاں چھوڑا ہے تم نےکوئی گوشہ میرؔ صاحب کسی بھی یاس و حسرت پر غزل کیسے کہوںمیں

کہا لوگوں نے احوالِ وطن پر میں بھی لکھوں پر اس گندی سیاست پر غزل کیسے کہوں میں

جو اپنے ساتھ لےجاتی ہے کچھ معصوم جانیں بتاؤ ایسی دہشت پر غزل کیسے کہوں میں

تری بے مہریاں وعدہ خلافی اور تغافل ان آیاتِ مُحبّت پر غزل کیسے کہوں میں

جب آمد ہو غزل کہنا بہت آساں ہے اشعؔر مگر تیری ضرورت پر غزل کیسے کہوں میں