حیات گو کہ غریبی میں بار گزری ہے

حیات گو کہ غریبی میں بار گزری ہے مگر بفضلِ خدا پُروقار گزری ہے

شعورِ ذات کی منزل چراغِ رہ کی طرح رہِ حیات میں حسنِ شعار گزری ہے

یہ کیا عجب ہے کہ جس سے ہیں سارے دکھ منسوب اسی کی یاد سدا چارہ کار گزری ہے

رہا ہے وعدہ شکن وہ سدا، مگر اپنی تمام عمر پئے اعتبار گزری ہے

میں اب بھی عالمِ تنہائی کے حصار میں ہوں اگرچہ وصل کی رُت بار بار گزری ہے

وہ شخص سب کا تعاقب کرے ہے اور اس کی اک اپنی ذات سے کرتے فرار گزری ہے

لکھو گے کیا شبِ ظلمت کے باب میں اشعؔر یہاں تو صبحِ بہاراں بھی تار گزری ہے