کارواں کو رہبروں سے بدگماں رکھا گیا

کارواں کو رہبروں سے بدگماں رکھا گیا لُوٹنے والوں کو میرِ کارواں رکھا گیا

درمیانِ زندگی و موت ہے بس اک فراق اور سزا کا کاٹنا بھی قرضِ جاں رکھا گیا

درد کی شدّت میں کھو بیٹھے تھے ہم اپنے حواس پھر نہ ہم سے رازِ دل کوئی نہاں رکھا گیا

اس نےکیا کھویا ہے کیا پایا یہ عُقدہ کب کھلا اک حسیں ابہام در سودِ وزیاں رکھا گیا

منزلیں پاتا رہا ہر گام حُسنِ ہم سفر عشق گَردِ راہ تھا سو رائیگاں رکھا گیا

سنگ میلو اب بھی سنتے ہیں گلہ رکھتے ہو تم ٹھوکروں میں تھے تمہیں منزل نشاں رکھا گیا

شمعِ محفل اب ہے اشعؔر آپ کے ہی روبرو یوں ذرا سی دیر ہم کو خوش گُماں رکھا گیا