یہ سوچتا ہوں کہ تازہ کوئی غزل کہہ دوں

	یہ سوچتا ہوں کہ تازہ کوئی غزل کہہ دوں میں تیرا نام نہ لوں اور تری غزل کہہ دوں
	فراقِ یار میں رومانوی غزل کہہ دوں خزاں میں گویا کوئی چمپئی غزل کہہ دوں
	کسی بھی جور و ستم کا گلہ کروں نہ مگر زبانِ مژگاں سے آنسو بھری غزل کہہ دوں
	وہ جلوے آج بھی محفوظ ہیں، جو اذن ملے میں اپنی آنکھوں میں رکھی ہوئی غزل کہہ دوں
	کہو تو میں تمہیں دے دوں لباسِ شعر و سخن نکھر سی جائے گی دوشیزگی، غزل کہہ دوں
	تمام رات کے موسم یہ چاہتے ہیں کہ میں ملادوں خاک میں تیِرہ شبی، غزل کہہ دوں
	یہ ضبطِ عشق نہ اشعؔر جو اعتراض کرے بیاں ہی کردوں میں دل کی لگی، غزل کہہ دوں