سُکوتِ دشت و صحرا جیسا منظر کر دیا دل کو

سُکوتِ دشت و صحرا جیسا منظر کر دیا دل کو دھڑکتے رہنا تک دنیا نے دوبھر کردیا دل کو

تم ہی تم بس نظر آؤ جدھر بھی گھوم کر پہنچوں کسی ان دیکھی قوّت نے وہ محور کردیا دل کو

تری یادوں کے گُل بوُٹوں سے اب بھی لہلہاتا ہے ترا دعویٰ غلط ٹھہرا کہ بنجر کردیا دل کو

مُحبّت میں خِرَد نے جب ہمیں دھوکے دیے پیہم تو پھر درماں یہی سُوجھا سو رہبر کردیا دل کو

ترے سبّ و شتم کا دوست میرے ،کیا صلہ دیتا مُناسب تھا یہی آئینہ پیکر کردیا دل کو

سوا تیرے کسی کا اب گُماں بھی رہ نہیں سکتا مطابق تیری خواہش کے ترا گھر کردیا دل کو

ترے اک قطرۂ ابرِ کرم نے تو مرے مولیٰ یقیں توحید کا دے کر سمندر کردیا دل کو

کمی جب بھی ہوئی محسوس اشعؔر نور کی ہم کو تو ان کے نام کی لَو سے مُنوّر کردیا دل کو