سُکونِ ساحلِ دریا مرے اندر نہیں ہے

سُکونِ ساحلِ دریا مرے اندر نہیں ہے کہ بحرِ دل سے موجِ غم کوئی باہر نہیں ہے

سنواروں کس طرح آخر خمِ زُلفِ تصوّر ابھی سُلجھا ہوا اتنا ترا پیکر نہیں ہے

مری غزلوں میں کیسے اور کوئی ہو، کوئی بھی مری سوچوں میں تیری ذات سے ہٹ کر نہیں ہے

کوئی بھی نشۂ مئے ناب بے خود کیا کرے گا تری آنکھوں کا جب تک سامنے ساغر نہیں ہے

خِرَد کے بادلوں سے کیوں نہ پھر بارود برسے جنوں کی دسترس میں جب کوئی پتّھر نہیں ہے

ہماری ذات سے کہہ دو ہمارے دشمنوں کو کسی خطرہ کا بھی امکاں پسِ منظر نہیں ہے

سکت مجھ میں کہاں بدلہِ کی تجھ سے اور یوں بھی کوئی بھی منتقم اللہ سے بڑھ کر نہیں ہے

تصوّر میں جو ہے میرے وہ بت کیسے تراشوں تصرّف میں مرے کوئی یدِ آذر نہیں ہیں

کہاں ہم چھوڑ کر جائیں گے تجھ کو شہر بھر میں ترا جیسا کوئی چہرہ کوئی پیکر نہیں ہے

یہی دیکھا ہے اشعؔر نے تری یادوں میں رہ کر یہاں دیواریں لاکھوں ہیں پہ کوئی در نہیں ہے