موت برحق ہے تو درماں کیا کریں

موت برحق ہے تو درماں کیا کریں کرکے بھی اندیشہء جاں کیا کریں

کیسے ہو تکمیلِ ایماں کیا کریں نفس ہے در دستِ شیطاں کیا کریں

پتّھروں کو مان لیتے ہیں خدا اور ہم تقدیسِ انساں کیا کریں

وصل کے لمحوں میں بھی در آئے گا پھر بچھڑ جانے کا امکاں کیا کریں

پہلے والوں نے ہمیں کیا دے دیا اور لا کر دل میں ارماں کیا کریں

خود بہ خود بڑھتی چلی جاتی ہے یہ بِیل تیری عشقِ پیچاں کیا کریں

اپنے دامن میں ندامت کے سوا کچھ نہیں تو نذرِ یزداں کیا کریں

تم چلے آؤ تو شہر آباد ہو دل تو ورنہ ہے بیاباں کیا کریں

وہ نہ آئے گا یہ دل سے کیا کہیں اک پریشاں کو پریشاں کیا کریں

ہیں پریشاں اشک میرے رات دن کیسے دھوئیں داغِ عصیاں کیا کریں

تم سے اشعؔر جاں کا چھوٹا سا سوال امتحاں کو اور آساں کیا کریں