مری آنکھوں میں وہ تیرے ستارے آج بھی ہیں

مری آنکھوں میں وہ تیرے ستارے آج بھی ہیں تروتازہ سرِ دامن شرارے آج بھی ہیں

مری جھولی میں آخر کیا نہیں جو ہاتھ پھیلیں جو کل حاصل تھے وہ جھوٹے سہارے آج بھی ہیں

نہیں ہے دل کا اب جن سے کوئی رشتہ سلامت زمانہِ کی نگاہوں میں ہمارے آج بھی ہیں

تو پھر کیسے کوئی جشنِ دلِ ویراں منائے بہت سے لوگ شہرِ دل کو پیارے آج بھِی ہیں

جو تم نے دل پہ چھوڑے تھے نشاں جوروستم کے لہو میں سانس لیتے وہ نظّارے آج بھی ہیں

میں جن صدیوں میں اس کو با وفا کہتا رہا ہوں وہ لمحے خوش گمانی کے گزارے آج بھی ہیں

خدا را غیر کی باتوں پہ اشعؔرتم نہ جاؤ ہمیں دیکھو تمہارے تھے تمہارے آج بھی ہیں