جب مری نظروں سے اُوجھل یہ جہاں ہوجائے گا

جب مری نظروں سے اُوجھل یہ جہاں ہوجائے گا میرا پیکر بھی زمانے سے نِہاں ہوجائے گا

وقت سے پہلے کا اندازہ گماں ہوجائے گا تیر کو تب دیکھنا جب بے کماں ہوجائے گا

لاکھ سو پردوں میں رکھو اس کی فطرت کے خلاف جذبہء دل خود بہ خود اک دن عیاں ہوجائے گا

کیا خبر تھی امن کی ہر چال خون آشام ہے حُرّیت کے نام کا منظر دھواں ہوجائے گا

سبز شاخوں پر، پرندوں کا ہے جو بھی آشیاں آگ برسے گی تو جل کے بے نشاں ہوجائے گا

ظالموں کو کیا مَیسّر آئے گی راہِ فرار ساتھ مظلوموں کے جس دن آسماں ہوجائے گا

خرمنِ دل کیا بچے گا ضبط کے آنچل کی خیر شعلہ ساماں دیکھنا جب سوزِ جاں ہوجائے گا

دشتِ الفت میں جب آجائے گا کوئی زلزلہ بارشِ مہر و وفا سے گلستاں ہوجائے گا

اس قدر تو قرب اس سے ہے کہ یہ عرفان ہو وہ ستمگر آج کا، کل مہرباں ہوجائے گا

منزلِ خود آگہی تک میں پہنچ جاؤں اگر آگہیء دہر کا سہل امتحاں ہوجائے گا

جس گھڑِی ہوجائے گا اس کو عطا اذنِ کرم سجدۂ اشعرؔ کو حاصل آستاں ہوجائے گا