قصّہ نہ پوُ چھا جائے جو تعبیرِ خواب کا

قصّہ نہ پوُ چھا جائے جو تعبیرِ خواب کا شکوہ کوئی کرے گا نہ میرے جواب کا

گو ڈر لگا تو رہتا ہے مجھ کو عتاب کا لیکن وہ ہے رحیم بڑا بے حساب کا

دیکھا جو اپنے ہاتھوں کے دامن میں بارہا تھا ہر دعا میں تذکرہ خانہ خراب کا

کیا پوچھتے ہو داستاں اس کے جمال کی کیا حُسن ہوسکے گا بیاں لاجواب کا

دریاؤں سے ،ندّی سے، سمندر سے ،جھیل سے میں پوچھتا ہوں راستہ بس اک سَراب کا

اے دوست اپنے بارے میں گر پوچھتا نہ تُو ہوتا سوال پیدا نہ میرے جواب کا

رہتا ہوں خوش کہ مولا غفورالرّحیم ہے خود آگہی رُلاتی ہے، ڈر ہے عذاب کا

ناکام امتحانِ محبّت ہوں میں تو کیا کس کو پتا ہے عشق کے سارے نصاب کا

حائل فراق و وصل کے مابین کچھ نہیں کچھ ہے تو صرف ایک ہمالہ حجاب کا

میزان کی صلیب نے دہلا کے رکھ دیا جب بھی خیال آیا گناہ و ثواب کا

گو خاک کردیا اسے جلووں کے شوق نے اشعرؔ میں حوصلہ تھا بڑے آب و تاب کا