نہ جانے کب چلے جائیں یہاں سے

نہ جانے کب چلے جائیں یہاں سے ہےرشتہ عارضی کون و مکاں سے

بلند تر ہے مقام ان کا بیاں سے جنہیں نسبت ہے کُوئے لامکاں سے

نشاں چھوڑے ہیں جو نعلینِ پا نے سمیٹو روشنی اس کہکشاں سے

اٹھاؤں گا میں کیا کشکول اب کے نہیں پایا ہے کیا اس آستاں سے

دلوں میں وسوسے لازم ہیں لیکن بچاتا ہے خدا ہی بدگماں سے

جو سجدے ہم بجا لاتے ہیں ان کا بلاوا آتا رہتا ہے اذاں سے

ہوائیں جب اکیلا چھوڑ بیٹھیں تو پھر کیا لینا دینا بادباں سے

بچائے برق بے چاری تو کیسے شراروں کی ٹھنی ہے آشیاں سے

سوائے خود فریبی کچھ نہیں ہے توقّع آج کل کے پاسباں سے

اگر مقصود ہے کچھ کامرانی گزرنا تو پڑے گا امتحاں سے

سَکوُتِ لب سے ہی جیتو گے اشعؔر محبّت ہار جاتی ہے فغاں سے