جو اپنی ذات محبّت پہ وار دیتے ہیں

جو اپنی ذات محبّت پہ وار دیتے ہیں وہی تو حسن کی دنیا نکھار دیتے ہیں

خزاں رسیدہ وہ پتّے جو شاخ چھوڑ چلے چمن کو تازہ اُمّیدِ بہار دیتے ہیں

کبھی تو نالہ و فریاد بھی وہ ٹال گئے کبھی بلا کا ہمیں اختیار دیتے ہیں

لہولہان ہیں سر، جن کے پتّھروں سے وہی جہانِ عشق کی زلفیں سنوار دیتے ہیں

کھُلا تو رکھتے ہیں دروازہء قفس وہ مگر پروں کو کاٹ کے راہِ فرار دیتے ہیں

وہ کرتے رہتے ہیں پیمانِ وصل اور سدا غمِ فراق و شبِ انتظار دیتے ہیں

ہمارے پاس فقیری میں بھی سنو اشعؔر بہت ہے پیار سو دنیا کو پیار دیتے ہیں