احباب سے ملی مجھے ایسی دعا کہ بس

احباب سے ملی مجھے ایسی دعا کہ بس دکھلا دیا خدا نے وہ اک معجزہ کہ بس

بے خود سا کردیا تھا مجھے اس نگاہ نے ایسا عجیب سا تھا وہ اک حادثہ کہ بس

میرا ہی ہوکے رہ گیا دنیا کو چھوڑ کر ایسا وفا شعار ہوا بے وفا کہ بس

کیسے گمان کرتا فریبی اسے کبھی کچھ ایسے عہد و پیماں وہ کرتا رہا کہ بس

افسوس میں نے تم کو مری جاں رلا دیا یہ داستاں سنو گے ابھی اور یا کہ بس

میں چل رہا تھا حُسنِ تصوّر کے کھوج میں دیکھا تمہیں تو دل نے کہا برملا کہ بس

ہر شخص میری جیت پہ اشعؔر خموش تھا ہارا ہوں میں تو ایسا تماشا ہوا کہ بس