یہی نتیجہ نکلنا تھا انتظار کے بعد

یہی نتیجہ نکلنا تھا انتظار کے بعد یقیں کسی کا نہیں تیرے اعتبار کے بعد

وہ دل لگی جسے تم پیار کہہ رہے تھے ابھی وہ بار بار کب ہوتا ہے ایک بار کے بعد

تمہی نہیں ہو یہاں ایک برگِ آوارہ کسے ملی رہِ منزل، رہِ فرار کے بعد

خدا کرے کہ اب ایسا کچھ اہتمام رہے خزاں قریب نہ آئے تری بہار کے بعد

تمام شہر سے کچھ مختلف تو تم بھی نہیں سو تم بھی آئے ہو، احوالِ سازگار کے بعد

مرا خیال ہے اب تم بھی اُٹھ چلو جاناں کہ محفلیں کہاں جمتی ہیں انتشار کے بعد

خود اپنے شعلے ہی پائے گی برق چار طرف ملے گا اور مرے گھر سے کیا شرار کے بعد

بچا سکتے ہو اپنی خودی کو تم بھی مگر کچھ اپنی ذات پہ تشکیل انحصار کے بعد

بتاتی رہتی ہے اکثر زمیں کی بے چینی سُکون ہوتا ہے قائم کچھ اضطرار کے بعد

یہاں کا شورِ سلاسل بھی دائمی تو نہیں نہ ہوگی رونقِ مقتل بھِی جاں نثار کے بعد

میں روشنی کا تصوّر ہی کیا کروں اشعؔر چراغ اور کہاں ہے دلِ فگار کے بعد