ظلم سے برسرِ پیکار تو رہنے دیتے

ظلم سے برسرِ پیکار تو رہنے دیتے عکسِ مظلوم سرِ دار تو رہنے دیتے

سر نہیں تھا نہ سہی رسمِ کہن کی خاطر گردنِ صدر پہ دستار تو رہنے دیتے

مجھ پہ حاصل ہے تمہیں حق پئے دشنام مگر اپنا یہ حق سرِ بازا رتو رہنے دیتے

پیار تو خیر کبھی مجھ سے تمہیں تھا ہی نہیں پیار کے نام کا بیوپار تو رہنے دیتے

ساری پابندیاں منظور تھیں مجھ کو لیکن ایک پابندی ء اظہار تو رہنے دیتے

چھوڑ آئے مری یادیں بھی لحد میں احباب کچھ دنوں ساتھ مرا پیار تو رہنے دیتے

ساتھ رہنے کی قسم چاہی تھی میں نے لیکن مرحلہ یہ بھی تھا دشوار تو رہنے دیتے

تم کو ہرجائی نہ کہتا کبھی اشعؔر جاناں تم ذرا خود کو وفا دا ر تو رہنے دیتے