تجھے بھلانے کا جاناں اب احتمال کہاں

تجھے بھلانے کا جاناں اب احتمال کہاں ہمارے زخم ابھی رُو بہ اندِمال کہاں

زمانہ وقت کے اوراق کتنے پلٹے گا مرے فسانے میں کچھ ذکرِ ماہ و سال کہاں

قدم قدم پہ ہے دنیا میں حُسن پھیلا ہوا تمام دنیا میں لیکن تری مثال کہاں

ترا مزاج ہے برہم تو بس یہ کافی ہے ہمارے جینے کا ایسے میں اب سوال کہاں

نظر گئی جو اُفق پر تو دل نے ہم سے کہا کہاں یہ چاند ستارے پری جمال کہاں

قدم بتاؤ میں اپنے زمیں پہ کیسے رکھوں زمیں پہ رکھتا ہے مجھ کو ترا خیال کہاں

ابھی تو اور کھلونے بہت سے ہیں اشعؔر ابھی تمہارے لیے وعدۂ وصال کہاں