وہ میرے ساتھ بہت دور تک گیا بھی نہیں

وہ میرے ساتھ بہت دور تک گیا بھی نہیں پھر اس کے بعد نگاہوں میں کچھ جچا بھی نہیں

لبوں پہ اس کے ملاقات کی دعا بھی نہیں مجھے یقین ہے لیکن، وہ بے وفا بھی نہیں

ہم اپنے شہر کے منصف سے اور کیا مانگیں ہمارے نام تو اس کے یہاں سزا بھی نہیں

نہ جانے کب سے نہ آئی تمہاری خوشبوبھی ہمارے ساتھ تو لگتا ہے اب صبا بھی نہیں

میں کم نگاہی کا اس سے گلہ ہی کیسے کروں مرے لبوں پہ کوئی حرفِ مُدَّعا بھی نہیں

تمہاری یادوں سے آباد میرا دل جاناں نہیں ہے دشت سا ویراں مگر بسا بھی نہیں

نکل تو جاتے پھر اک بار ہم سفر پہ مگر تمہارا جیسا کوئی ہمسفر ملا بھی نہیں

وہ اعتدال کا قائل ہے اس لیے شاید بہت چُھپا بھی نہیں ہے، بہت کھُلا بھی نہیں

مُخالفت کا گلہ دوستوں سے کیا اشعؔر ہمارے دوش پہ یارو رُخِ ہوا بھی نہیں