یہ ٹِمٹِماتی ہوئی روشنی دیے کی ہے

یہ ٹِمٹِماتی ہوئی روشنی دیے کی ہے بہت طویل کوئی زندگی دیے کی ہے

ہوائے تند نے گل کردیے ہیں شمس و قمر یہ روشنی جو ہے باقی کسی دیے کی ہے

شبِ سُخن میں یہ رونق کمالِ فن کی نہیں ہے جو بھی رونقِ محفل سبھی دیے کی ہے

یہ لَو جو سُرخی دکھاتی ہے تم کو خوں کی مرے اسی سے آج بھی کھیتی ہری دیے کی ہے

دیوں سے بھاگنا تقدیر ہے اندھیروں کی وگرنہ کس سے کوئی دشمنی دیے کی ہے

تم حسن ظن ہی سمجھ لو مگر لگے ہے یہی کہ ہلکے ہلکے بھڑکنا ہنسی دیے کی ہے

سُخن تمہارے بہت خوب ہیں مگر اشعؔر تمہاری ذات میں سب آگہی دیے کی ہے