جس سے بچھڑے ہوئے زمانہ ہوا

جس سے بچھڑے ہوئے زمانہ ہوا اک نفس سے بھی وہ جدا نہ ہوا

بام پر وہ، وہ اگر نہیں تو میاں چاند اُفق پر ہُوا، ہُوا نہ ہُوا

دل میں گھر کر گیا بُتِ کافر کیا ترا دل صنم کدہ نہ ہُوا

ان پہ احوالِ واقعی میرا یوں کھُلا جیسے اک فسانہ ہوا

اب ہَواؤں کو اس سے کیا مطلب اور گھر میں دیا ہُوا نہ ہُوا

ان لبوں پر کھِلا جو گُل کی طرح وہ تبسّم ہی قاتلانہ ہوا

تاکہ ساقی ترا بھرم رہ جائے اشعؔرِ تشنہ، لب کُشا نہ ہُوا