مرے اشعار کچھ شیریں بھی ہیں تلخی رساں بھی

مرے اشعار کچھ شیریں بھی ہیں تلخی رساں بھی یہی شاید ہیں میری زندگی کے ترجماں بھی

یہ بے اوقات سی مٹّی سے جو انساں بنا ہے اسے چشمِ تحیّر سے تکے ہے آسماں بھی

وہی جو صاحبِ معراج ہیں، خیرالبشرؐ ہیں انہی کے نقشِ پا ہیں میری منزل کے نشاں بھی

میں ڈرتا ہوں کوئی زاہد مجھے مشرک نہ کہہ دے خدا بھی ہے مرے دل میں، کئی عکسِ بُتاں بھی

یہ خواہش ہے سرِ تسلیم خم رکھوں مگر وہ سَکُوتِ لب بھی مجھ سے چاہتا ہے اور بیاں بھی

عزیز از جان و دل رکھتا ہے مجھ کو اپنے جی میں مگر رہتا ہے وہ میری وفا سے بدگُماں بھی

کچھ حصّہ وحشتِ قلب و نظر کا بھی تھا لیکن بہت رسوائی کا باعث ہوا ہے راز داں بھی

نہیں ہوتی رہِ منزل بہت آسان اشعؔر خس و خاشاک بھی ہوتے ہیں آوازِ سگاں بھی