نشاں تو ڈھونڈے سبھی نے مگر ملے ہیں نہیں

نشاں تو ڈھونڈے سبھی نے مگر ملے ہی نہیں طلسمِ برق تو دیکھو شرر ملے ہی نہیں

جو میں نے سوچا وہی بات اس نے کی ہوتی ہمارے فکر و نظر یوں مگر ملے ہی نہیں

نہیں ہیں آج انا الحق کے دعویدار کہیں سو اہلِ حق بھی کسی دار پر ملے ہی نہیں

کبھی ملو جو کہِیں تم تو یہ گلہ بھی کریں زمانہ ہوگیا لختِ جگر ملے ہی نہیں

وہ دیدہ ور جنہیں منزل دکھائی دیتی ہے ہماری قوم کو وہ راہبر ملے ہی نہیں

ہم اپنی حدِّ مہیّا بھی چھو سکے نہ کبھی قَفَس میں اتنے بال و پر ملے ہی نہیں

قدم قدم پہ نہ دیتے جو آبلوں کا پیام ہمارے پاؤں کو ایسے سفر ملے ہی نہیں

شجر تو جادۂ دشوار میں بہت تھے مگر جو سایہ دیتے ہمیں وہ شجر ملے ہی نہیں

بچھڑ گئے تو ہم ان کو ،ہمیں وہ، شام و سحر تلاش کرتے رہے ہیں، مگر ملے ہی نہیں

جو کہہ گئے تھے سفر میں رہیں گے ساری حیات کبھی ہمیں تو سرِ رہگزر ملے ہی نہیں

یہ کیسا بانجھ سمندر ہے کیا کہیں اشعؔر صدف، صدف کو کھنگالا، گُہر ملے ہی نہیں