یہی نہیں کہ فقط لطفِ زندگی کم ہے

یہی نہیں کہ فقط لطفِ زندگی کم ہے جو تو نہیں تو مرے گھر میں روشنی کم ہے

سزا کچھ ایسی بتاؤ کہ حق ادا ہوجائے تمہیں رلایا ہے میں نے تو خودکشی کم ہے

بس اک یہی تو ہے تم سے ہمیں گلہ جاناں کہ تم کو ہم سے شکایت کوئی رہی کم ہے

یہ تم سے روح کا رشتہ بھی کم نہیں لیکن نشاطِ جاں کے لیے حرفِ دوستی کم ہے

اسے یقین ہے میں ہار جاؤں گا اس سے وہ کیا کرے کہ اسے مجھ سے آگہی کم ہے

خوشا کہ کچھ تو نئے قافلے بھی چل نکلے سنا یہ ہے کہ ذرا خوفِ رہزنی کم ہے

نہ سامعین نہ شعراء نہ شاعرات ہیں کم مشاعروں میں اگر ہے تو شاعری کم ہے

خجل سا ہوں کہ مسیحا سے کیا بیان کروں وہ آگیا ہے تو اب دل میں درد بھی کم ہے

گیا ہے جب سے مرا دوست روٹھ کر اشعؔر مرے لبوں پہ اسی روز سے ہنسی کم ہے