بہت مشکل یہ اندازہ لگانا ہوگیا ہے

بہت مشکل یہ اندازہ لگانا ہوگیا ہے اسے دیکھے ہوئے کتنا زمانہ ہوگیا ہے

لبوں سے آلگی ہے پھر دعائے زندگانی تو گویا زندگی سے دوستانہ ہوگیا ہے

اسے تو اپنا سایہ بھی لگے ہے دستِ قاتل کچھ اس کا نظریہ ہی دوستانہ ہوگیا ہے

سرِ بازار بھی اب تو سماں مقتل کا ہوگا مزاجِ عالمِ نو قاتلانہ ہوگیا ہے

ضرورت سے زیادہ عاجزی کا ہے نتیجہ کہ ہر انداز اس کا حکمرانہ ہوگیا ہے

خدا سے میں بھلا اب اور کیا مانگوں بتاؤ مرا اس کی گلی میں آنا جانا ہوگیا ہے

تجھے خنجر بکف پھرنے کی اب کیا ہے ضرورت ترا ہر لفظ ہی اک تازیانہ ہوگیا ہے

نہ جس پر تھا قسم کھانے میں بھی کوئی تذبذب وہ جذبہ میری آنکھوں میں فسانہ ہوگیا ہے

مچلتا ہے مرا دل بھی کہ اشعؔر لوٹ چلیے وطن کا اب تو موسم عاشقانہ ہوگیا ہے