نئے رستوں پہ ہے منزل پرانی دیکھ لینا

نئے رستوں پہ ہے منزل پرانی دیکھ لینا دمِ آغاز انجامِ کہانی دیکھ لینا

یقیں ہوجائے گا محکم مکافاتِ عمل پر کسی پر تم گزرتے ناگہانی دیکھ لینا

ہمیشہ ساتھ رہنے کا میں وعدہ کررہا ہوں مگر تم اعتبارِ زندگانی دیکھ لینا

بسانے جارہے ہو تم نیا گھر جاؤ لیکن نہ پھر کرنا پڑے نقلِ مکانی دیکھ لینا

قدم رکھ لو حدِ آخر کے بھی اس پار جاناں مگر امکانِ راہِ درمیانی دیکھ لینا

مری مانو یقیناً آج کے ماحول میں بھی روایت کوئی تو ہوگی پرانی دیکھ لینا

وفا کا عہد تحریری نہیں ہے خیر پھر بھی کم ازکم وزنِ پیمانِ زبانی دیکھ لینا

ہمیں مسمار کرڈالو تمہارے ہاتھ سے بھی نکل جائے گی اک دن راج دھانی دیکھ لینا

رہے گی دیر تک روشن جو کل بعد شبِ غم وہ آجائے گی صبحِ شادمانی دیکھ لینا

بہت واضح عبارت ہوگی مسلم کی جبیں پر لکھی جائے گی اک دن کامرانی دیکھ لینا

تمہاری بے وفائی یاد کیا رکھیں گے اشعؔر کہاں بھولیں گے وہ باتیں پرانی دیکھ لینا