ہمارے دستِ طلب میں کوئی سوال کہاں

ہمارے دستِ طلب میں کوئی سوال کہاں انا پرستی کی اس سے بڑی مثال کہاں

جمالِ یار کہاں نسبتِ جمال کہاں ہمارا وہ مہِ کامل کہاں، ہلال کہاں

چلا تو آئے وہ ظالم ہمیں منانے مگر ہمارے پاس کرامات کا کمال کہاں

وہ دل میں درد کی لذّت کی حال کیا جانے مُیسّر اس کو ابھی دولتِ ملال کہاں

وہ لوٹ آئے تو دروازہ بند کیسے کریں ہمارے پاس محبّت کا ایسا کال کہاں

جو زخم تم نے دیئے ہیں سبھی نئے ہیں ابھی ابھی سے ان کا ہمیں فکرِ اندمال کہاں

جو کھانے والے پہ سو بار اپنے ناز کرے سبھی کے حصّہِ میں وہ لقمۂ حلال کہاں

سوائے نعرۂ تکبیر و کلمہ اپنا کہاں ہے کوئی سپر اور کوئی ڈھال کہاں

سفر تو ٹھیک ہی لگتا ہے یہ مگر اشعؔر چلا ہے لے کے ہمیں اب غمِ مآل کہاں