میں چاہتا ہوں تجھے شہر سے نہاں رکھوں

میں چاہتا ہوں تجھے شہر سے نہاں رکھوں سو تجھ کو دل میں نہ رکھوں تو پھر کہاں رکھوں

یہ بوئے مشک جو ہے خاص آپ سے منسوب اسی کو آپ کے کوُچہِ کا میں نشاں رکھوں

کہاں ہے اور کوئی بے نیاز تیرے سوا مجال کیا ہے مری اور کا گماں رکھوں

یہ آرزوئے جبیں ہے اگر اجازت ہو تمہارے در کو بنا کر میں آستاں رکھوں

وہ بے گھری کے مناظر مجھے بھی کہتے ہیں نہ سر پہ اپنے کوئی چھت نہ آسماں رکھوں

تباہ کاریء فطرت کی ظلمتوں کے لیے میں اپنی آنکھ میں تاروں کی کہکشاں رکھوں

جدھر بھی جاتا ہوں سب پوچھتے ہیں نام ترا میں تیرے شہر میں کس کس کو راز داں رکھوں

تمہی پہ مرنا مقدّر ہوا تو پھر جاناں تمہارے پیار کو کیسے نہ حرزِ جاں رکھوں

میں ناخدا ہی فقط ہوں خدا نہیں اشعؔر بچائے کیسے ہر آندھی سے بادباں رکھوں