دیے جلاؤ نہ بیکار تیرگی کے لیے

دیے جلاؤ نہ بیکار تیرگی کے لیے ترس رہے ہیں بہت لوگ روشنی کے لیے

یہی نہیں کہ ہم آئے ہیں بندگی کے لیے ہمیں تمہاری ضرورت ہے زندگی کے لیے

قرار دادیں جو ظلم و ستم کی پاس کرے اسی کو ملتا ہے 'نوبل ' بھی آشتی کے لیے

وہ دوست کیا مرا دشمن بھی ہونہیں سکتا مرا معیار مقرّر ہے دشمنی کے لیے

تجھے بھی پڑھنا ہے باقی مگر ابھی تو مجھے بہت ہے کام مری جاں خود آگہی کے لیے

مری غزل میں کوئی اور کیسے در آئے ترا جمال ہے بس میری شاعری کے لیے

کسی کسی کو ہے بس تھوڑی فکر زادِ سفر اگرچہ لکھا ہوا ہے سفر سبھی کے لیے

یہ کون کہتا ہے حیوان ہونا لازم ہے اب ایسی شرط کہاں ہے درندگی کے لیے

تجھے گلے سے لگا لے گا دوڑ کر اشعؔر بڑھا کے دیکھ ذرا ہاتھ دوستی کے لیے