غلط ہے اس کا مقدر ہوا کے ہاتھ میں ہے

غلط ہے اس کا مقدر ہوا کے ہاتھ میں ہے کہ جلنا بجھنا دیے کا خدا کے ہاتھ میں ہے

کوئی مسیحا ہمارے تو کام آنہ سکا سو دردِ دل کے لیے کیا دوا کے ہاتھ میں ہے

میں اس یقیں سے اُٹھاتا ہوں اپنا دستِ طلب حیات و موت بھی گویا دعا کے ہاتھ میں ہے

نہ کیسے شہر کی سڑکوں پہ موت رقص کرے تعصّبات کا خنجر فضاء کے ہاتھ میں ہے

کھلی فضا میں کھڑا ہوں کسی امّید پہ میں تمہاری خوشبو سنا ہے صبا کے ہاتھ میں ہے

یہ ہست و بود کے مابین اور کچھ بھی نہیں عدم کی بات مگر ہاں قضا کے ہاتھ میں ہے

رہوں گا صرف تمہارا ہی میں مگر اشعؔر مرا یہ وعدہ تمہاری وفا کے ہاتھ میں ہے