اپنے جواں سال بیٹے ... سیّد محمّد دانش مرحوم و مغفور کی یاد میں

اپنے جواں سال بیٹے سیّد محمّد دانش مرحوم و مغفور کی یاد میں جو 28 اگست 2003 کو کار کے ایک حادثہ میں شہید ہوگئے انّا للہِ و انّا اِلیَہِ راجعون ښ

نہ دشمنوں پہ بھِی میرے یہ وقت آئے میاں جواں پسر سے خدا صبر آزمائے میاں

ہمیں دلاسہ بھی دینے کو کون آئے میاں ہماری صورتِ گریاں کسے رجھائے میاں

ہمالہ جیسے دکھوں پر لہو نہ روئیں تو پھر فرارِ غم کا ہی رستہ کوئی سجُھائے میاں

چمن میں تتلیاں اور پھُول سب وہی ہیں مگر ہمارے دل میں کہاں سے بہار آئے میاں

ہمیں بھی جانا ہے اک دن تری طرح جاناں نہ ہوگا مشورہ پہلے نہ کوئی رائے میاں

لگے ہے لمحہ بکھرنے میں زندگی اور ہم کھڑے ہوئے ہیں زمانوں سے لو لگائے میاں

ہمارا شیشہء نورِ نظر ہی ٹوٹ گیا اب اپنا عکس ہمیں کیا کوئی دکھائے میاں

وہ لے کے حکمِ خدا آئے جب تو پھر کہیے اجل کی آندھی نہ کیسے دیا بجُھائے میاں

میں جاتا رہتا ہوں اس کو دعائیں دینے مگر کبھی تو اس کی بھی آواز مجھ کو آئے میاں

جوان بیٹے کی تدفین کرکے بھی اب تک کھڑے ہیں زندگی کاندھوں پہ ہم اُٹھائے میاں

بہت زیادہ نہ ہو رختِ زندگی اشعؔر بس اتنا رکھیے کہ دنیا لگے سرائے میاں