علاجِ ظلمتِ شب کچھ تو اب کیا جائے

علاجِ ظلمتِ شب کچھ تو اب کیا جائے ہمارے شہر میں کوئی دیا جلا جائے

یہ تجھ پہ مرتا ہے کمبخت کیا کیا جائے ترے سوا دلِ خود سر کو کیا دیا جائے

بس ایک چاکِ گریباں کی فکر ہے سب کو ہمارا     چاکِ جگر بھی کبھی سیا جائے

ہوائیں لاکھ دھکیلیں مجھے عدم کی طرف بلاوا آئے نہ جب تک، مری بلا جائے

بچا رہوں گا میں ذلّت کی دھوپ سے جب تک نہ میرے سر سے ترے سائے کی ردا جائے

ہمارے شہر میں تنہائی کی کمی تو نہیں تو کس لحاظ سے پھر دشت میں رہا جائے

جہاں جہاں سے پُکارا گیا ہوں میں اشعؔر میں چاہتا ہوں وہاں تک مری صدا جائے