نعت رسول مقبول - رخت زندگی

نعتِ رسول مقبول﷑ ۔

مجھ کو درکار خزینہ ہے رسولؐ عربی مقصدِ زیست مدینہ ہے رسولؐ عربی

آپؐ چاہیں گے تو مل جائے گا ساحل ورنہ بحرِ عصیاں میں سفینہ ہے رسولؐ عربی

مشک و عنبر سے مہکتا ہے مدینہ سارا آپؐ کا کیسا پسینہ ہے رسولؐ عربی

خاکِ طیبہ گئی آنکھوں میں تو محسوس ہوا ذرّہِ ذرّہِ میں سکینہ ہے رسولؐ عربی

کون کہتا ہے کہ جنّت اسی دنیامیں نہیں اسی دنیا میں مدینہ ہے رسولِؐ عربی

صرف مولیٰ و ملائک نہیں مصروفِ درود یہی مومن کا قرینہ ہے رسولِؐ عربی

آپؐ کی یادوں سے خالی ہے اگر تارِ نفس وہ بھی جینا کوئی جینا ہے رسولؐ عربی

جامِ کوثر تو مجھے حشر میں انشااللہ آپؐ کے ہاتھ سے پینا ہے رسولؐ عربی

پیار سے رکھا ہے جس دل نے بھی محفوظ تمہیں نور و نکہت وہی سینہ ہے رسولِؐ عربی

آپؐ کے نام سے پاتا ہے بلندی اشعرؔ آپؐ کا نام ہی زینہ ہے رسولِؐ عربی