حمد باری تعالیٰ - رخت زندگی

حمدِ باری تعالیٰ

ہماری ہر تمنّا سے نہایت آشنا ہے پر اس کی دین کا انداز حکمت آشنا ہے

وہی ملتا ہے بس ہم کو جو ہوتا ہے مناسب شعورِ خیر و شر سے وہ بکثرت آشنا ہے

چھپائیں اس سے کوئی بات ہم کیسے کہ وہ تو دلوں میں جھانک لیتا ہے حقیقت آشنا ہے

اگرچہ فرض تھا ہر حال میں بس شکر کرنا مگر سو خواہشیں اور دل شکایت آشنا ہے

یقیں اس کی عطا پر گر نہیں دستِ دُعا میں تویہ دعویٰ ترا کیسا کہ قدرت آشنا ہے

محمدؐ مصطفیٰ کو جو بنا لے اپنا رہبر وہی بے شک زمانے میں ہدایت آشنا ہے

یقین سا ہے کہ مولیٰ بخش دے گا مجھ کو اشعرؔ مرے اعمال سے واقف ندامت آشنا ہے